ಸಿಡಿಲೊಡೆದು ಪಳೆಯುಳಿದ
ಇಟ್ಟಿಗೆಗೂಡಲೊಂದು
ಚಾ ದುಖಾನು
ಹೋದ ತಿಂಗಳ
ಪ್ರಜಾಮತದ ಮುಖಪುಟದಿ
ಸುಮಲತಾಳ ಹುಸಿನಗು
ಪಟ್ಟಿಗಾಜಿನ ಲೋಟದ ತಳದಲಿ
ನೀರ್ಕಾಪಿ,
ದವಡೆಯಾಡಿಸಲು ಒಣಕಲು ಬನ್ ಒಂದು
ಮನಸಿನಾಳದ ಕೊರಗು,ಲೋಕಾರೂಢಿ ಚಿಂತೆ
ಎಲ್ಲವೂ ಬ್ರಿಸ್ಟಲ್ ಸಿಗರೇಟಿನ
ಹೊಗೆಯಾಗಿ ಗಾಳಿಯಲಿ ಲೀನ
ಮೂಲೆಮೂಲೆಯ ಜನ್ಮ ಜಾಲಾಡಿ
ಮುದಿರೆಲೆಯ ಗತಿಕಾಣಿಸಿದ
ಉದಯವಾಣಿ ಪತ್ರಿಕೆಯೊಂದು
ಬೆಳಗಿಂದ ಕೂತು ತಲೆಕೆರೆದು ಕುರಮಾಡಿ ಮುಗಿಸಿದ
ಕಾಪಿ-ಬನ್ನು-ಇಡ್ಲಿ-ಮಸಾಲ್ ವಡೆ-ಚಿತ್ರಾನ್ನ-ಸಿಗರೇಟಿನ
ಒಟ್ಟು ಮೊತ್ತ ಇಪ್ಪತ್ತು ರುಪಾಯಿ!!
ಏನಾದರೇನು?
ಗೋರ್ಬಚೇವನಿಗಾಗಲೀ
ಬುಶ್ಶಪ್ಪನಿಗಾಗಲಿ ಮೋಕ್ಷವಿಲ್ಲ,
ಕುಂತಿ ಮಕ್ಕಳಿಗೆ ರಾಜ್ಯವಿಲ್ಲ!ಲೇಬಲ್ಗಳು: Abstract, Poem, ಆ ದಿನಗಳು, ಕವನ
Thursday, August 14, 2008
ನೆನ್ನೆಯ ನಾಳೆಯೊಂದು ಯೋಚಿಸಿತು
ಮೊನ್ನಿನ ನಾಳೆ ಹೀಗೆ ಮಾಡಿದ್ದರೆ
ನಾಳೆಗಳ ನೆನ್ನೆಗೆ ಈ ಗತಿ ಬರುತ್ತಿರಲಿಲ್ಲವೇನೋ!?
ಆದರೆ,
ನೆನ್ನೆಗೂ ನೆನ್ನೆಗಳಿದ್ದುದ
ಏಕೆ ಮರೆತುಹೋಯಿತೋ!?
ಇದಕ್ಕುತ್ತರವಾಗಿ ಎಸ್ಸೆಮ್ಮೆಸ್ ಮೂಲಕ ಗೆಳೆಯ ಸಂತೋಷ ಕಳಿಸಿದ ನಾಕು ಸಾಲುಗಳು ಹೀಗಿವೆ:
ಇಂದು
ನಾಳೆಯ ನೆನ್ನೆಯೊಂದು
ಯೋಚಿಸಿದ್ದರೆ ನೆನ್ನೆಯ ನಾಳೆಯ ಬಗ್ಗೆ
ಪರಿತಪಿಸಬೇಕಾಗುತ್ತಿರಲಿಲ್ಲವೇನೋ ಹೀಗೆ
ನೆನ್ನೆ ನಾಳೆಗಳ ಮಧ್ಯೆ;
ಆದರೇನು ಮರೆತಿಹೆವೆಲ್ಲ
ನೆನ್ನೆಯ ನಾಳೆಯಲಿ
ನಾಳೆಯ ನೆನ್ನೆಯಲಿ
ಬದುಕುವುದ ನಾವು!
--ಸಂKಲೇಬಲ್ಗಳು: Chutuka, ಇಂದು, ಕಿರುಗವಿತೆ, ಚುಟುಕ, ನಾಳೆ
Wednesday, April 30, 2008
ಸರಿಯಿಲ್ಲ...ಸರಿಯಿಲ್ಲ...ಸರಿಯಿಲ್ಲ...
ದೂರವಾಣಿ ಸಿಕ್ಕುತ್ತಿಲ್ಲ...
ಕಾಗದಗಳು ತಲುಪುವುದೇ ಇಲ್ಲ...
ಎರಡು ತಿಂಗಳಿನಿಂದ ಅಪ್ಪ ಅಮ್ಮನ ಕೂಡ
ನಗುನಗುತ ಮಾತನಾಡಿದ ನೆನಪೇ ಇಲ್ಲ
ಸಂಪರ್ಕದ ಹಾದಿ ಸುಗಮವಾಗಿರಬೇಕಲ್ಲ!!
ಅಪ್ಪ-ಅಮ್ಮನ ಪ್ರೀತಿಯ ಮಾತುಗಳಿಂದ
ವಂಚಿತರಾದ ಮಕ್ಕಳೆಲ್ಲ
ಅದೇ ಊರಿನ ವೃದ್ಧಾಶ್ರಮದ ವಿರುದ್ಧ
ದಾವೆ ಹೂಡಿದ್ದಾರಂತಲ್ಲ!!!ಲೇಬಲ್ಗಳು: ಕವಿತೆ, ವಿಪರ್ಯಾಸ
Monday, February 11, 2008
ಬೆನ್ನಮೇಲೆ ಹೊತ್ತ
ನೆನ್ನೆಗಳ ಮೂಟೆಯನು
ಅರೆಘಳಿಗೆ ಕೆಳಗಿಳಿಸಿ
ನಾಳೆಗಳ ದಿಗಂತದೆಡೆಗೆ
ಕಿರುಗಣ್ಣಿನಲಿ ನೋಡಲು
ತೆಗೆದುಕೊಂಡ ಅಲ್ಪ-ವಿರಾಮ!!ಲೇಬಲ್ಗಳು: definition, ಇಂದು, ವ್ಯಾಖ್ಯಾನ
Thursday, February 7, 2008
ಡಾವಿಂಚಿ ಚಿತ್ರಿಸಿದ
ಮೊನಾಲಿಸಳ ನಗೆ,
ರವಿವರ್ಮ ಬರೆದ
ಹೆಂಗಳೆಯರ ಹಾಗೆ
ನನ್ನವಳ ಮುಖಾರವಿಂದವನೂ-
ಚಿತ್ರಿಸಿ,ಬಣ್ಣಗಳಿಂದ ಮೇಳೈಸಿ
ಅದಕ್ಕೊಪ್ಪುವ ಚಿನ್ನದ ಬಣ್ಣದ
ಚೌಕಟ್ಟೊಂದನ್ನು ಹುಡುಕಿ ತಂದೆ
ಮನದಾಳದ ಮನೆಯ
ಸ್ಮೃತಿಪಟಲದ ಗೋಡೆಗೆ
ತಗುಲಿ ಹಾಕೋಣವೆಂದರೆ
ನೆನಪುಗಳ ಮೊಳೆಯೊಂದೂ ಇರಲಿಲ್ಲ!ಲೇಬಲ್ಗಳು: kavana, Poem, ಕನವರಿಕೆ, ಕವನ
Wednesday, October 3, 2007
ಸ್ನೇಹಿತನೊಬ್ಬನು ಇತ್ತೀಚೆಗೆ ಭಾರತಕ್ಕೆ ವಾಪಸ್ಸಾದ. ಅವನ ಬೀಳ್ಕೊಡುಗೆಗಾಗಿ ಈ ನಾಕು ಸಾಲುಗಳು
ಮೌನಿ
ಜಗದ ಜವಾಬ್ದಾರಿಗಳೆಲ್ಲ ತನ್ನ ತೋಳ ಮೇಲೆಂಬಂತೆ
ಸುರು-ಸುರುಳಿಯಾಗಿ ತೇಲಿಬಿಟ್ಟಾಗ
Marlboro Redನ ಹೊಗೆ ಗಾಳಿಯಲ್ಲಿ ಲೀನ
-ಹೆಚ್ಚು ಮಾತಿಲ್ಲದ ಮೌನಿ
ಅಮಾವಾಸ್ಯೆಗೊಮ್ಮೆ ಹುಣ್ಣಿಮೆಗೊಮ್ಮೆ
ತುಟಿಯಂಚಲಿ ನಗು ಕಂಡರದೇ
ಗೆಳೆಯ ಬಳಗಕ್ಕೆಲ ಪರಮಾಶ್ಚರ್ಯ
- ಗಟ್ಟಿಯಾಗೊಮ್ಮೆ ನಕ್ಕುಬಿಡು ಮೌನಿ
ನೀರು(!?) 'ಕುಡಿ'ದಷ್ಟೆ ಸುಲಭ,
ಕುಡುಕರನೂ ನಾಚಿಸಿ ನೀರಾಗಿಸುವವ
ಸಲೀಸಾಗಿ ಪೀಪಾಯಿಗಳನೇ ಸದ್ದಿಲ್ಲದೇ ಕುಡಿದೇಳುವವ
ಮನಪೂರ ಮಾತಾಡಿಬಿಡು ಮೌನಿ
ಬೀರುವಿನಲ್ಲಿ ಮಡಿಚಿಟ್ಟ ಜೀನ್ಸುಗಳೆರಡು
ನುಸಿಗುಳಿಗೆಯೊಡನೆ ಬಾಳುವ ಕೋಟುಗಳಿನ್ನೆರಡು
ಸದಾ Formalsನಲ್ಲೆ ನಲಿಯುವವ
ಮೊನ್ನೆ ಶುರುವಾದ ಛಳಿಗೂ ಛಳಿಯಾಗಿರಬಹುದೇನೋ
ಇವನನ್ನಲ್ಲಾಡಿಸಲಾಗಲಿಲ್ಲ - ಒಮ್ಮೆ ಮೈಪೂರ ಕೊಡವಿ ನಡುಗಿಬಿಡು ಮೌನಿ
ಎನಾದರಾಗಲಿ, ಬರುವುದೆಲ್ಲ ಬರಲಿ
ಭವಬಂಧನದ ಭಾರವ ಕೆಳಗಿಳಿಸು ಕೊಂಚ
ಹೊಗೆ-'ಕುಡಿ'ಯುವುದ ಕಡಿಮೆ ಮಾಡಿ
ನಕ್ಕು ನಲಿದಾಡು ಆಗೊಮ್ಮೆ ಈಗೊಮ್ಮೆ
ಆಗದಿದ್ದರೇನಾಯ್ತು ಬಿಡು – ನೀ ಬದಲಾಗದಿರು ಮೌನಿ!
Tuesday, January 23, 2007
ಹಿಂದೊಮ್ಮೆ ಮುದ ನೀಡುತ್ತಿದ್ದ
ಅನನ್ಯ ಅನುಭವಗಳೆಲ್ಲವೂ
ಇಂದೇಕೋ ಜೀವವಿಲ್ಲದ
ಯಾಂತ್ರಿಕ ನಡವಳಿಕೆಗಳಾಗಿವೆ
ಆಸರೆಗಾಗಿ ಓಡೋಡಿ ಬಂದು
ದಡವನ್ನು ಬಾಚಿ ತಬ್ಬುತ್ತಿದ್ದಲೆಗಳೆಲ್ಲವೂ
ಕಾರ್ಯನಿರತ ಕಾರ್ಮಿಕರಂತೆ ಬಂದು
ಮರಳಿನ ಮೇಲೆ 'ಸಹಿ'ಸಿ ಹೋಗುತ್ತಿವೆ
ಸಂಜೆಮೊಗ್ಗಿನ ಕಂಪನ್ನು ತೀಡಿ ತಂದೊಡ್ಡುತ್ತಿದ್ದ ತಂಗಾಳಿಯೂ
ನಿವೃತ್ತ ಓಲೆಕಾರನಂತೆ ಅರೆ-ಬೇಸರದಿಂದ
ಹೊಗೆ-ತಿಪ್ಪೆ ಹೊಂಗೆ-ಮಲ್ಲಿಗೆಗಳ ಬೇಧಭಾವವಿಲ್ಲದೆ
ಕರ್ತವ್ಯ ನಿರತವಾದಂತೆ ಭಾಸವಾಗುತ್ತಿದೆ
ಲಾಲ್?ಬಾಗಿನ ಮರಮರಗಳಿಂದ ಉದುರುವ
ಸುಗಂಧಭರಿತ ಹೂವುಗಳೂ,ಬಣ್ಣಬಣ್ಣದ ಎಲೆಗಳೂ
ಮುಂಜಾನೆ ಮಬ್ಬಿನಲ್ಲಿ ಎದ್ದೋಡುವವರ ಕಾಲ್ತುಳಿತಕ್ಕೆ ಸಿಕ್ಕು
ಹಾದಿಬದಿಯಲಿ ಗುಡ್ಡೆಹಾಕಿದ ಗೊಬ್ಬರವಾಗಿವೆ
ಅದೇ ಗಾಳಿ ಅದೇ ನೀರು ಅದೇ ಊಟ ಅದೇ ಕೆಲಸ
ಎಲ್ಲವೂ ಅದದೇ ಅನ್ನುವ ಏಕತಾನತೆಯ ಉನ್ಮತ್ತ ಭಾವ
ಮನದೊಳಗಿನ ಭಾವನೆಗಳನೂ ಒಂದೇ ತೆರನಾಗಿಸಿ
ಭಾವನೆಗಳ ಸಾವಿಗಂಜುವ ಭಾವುಕನನ್ನಾಗಿಸಿದೆ
Tuesday, November 21, 2006
