ಹಳ್ಳಿ ನೆನಪು

ಹಳೆಯ ತೊಟ್ಟಿ ಮನೆ- ಹೆಂಚುಗಳ ಸೀಳಿ ಸದ್ದಿಲ್ಲದೇ ಒಳ ಬಂದ ಎಳೆ ಸೂರ್ಯನ ಬಿಸಿಲ್ಗೋಲುಗಳ ನಡು-ನಡುವೆ ಹೆಜ್ಜೆ ಸಪ್ಪಳ ಕೇಳದಂತೆ ಮಡಿಕೋಲ ಹಿಂದಿನಿಂದ ಬಾಲಮುದುಡಿ ಒಳಬಂದ ಕದ್ದು ಹಾಲ ಕುಡಿವ ಮುದ್ದಿನ ಬೆಕ್ಕು ಅಲ್ಲಲ್ಲಿ ಅಷ್ಟಿಷ್ಟು ಹರಡಿ ಹೋಗಿದ್ದ ಅಕ್ಕಿ-ಗೋಧಿ ಕಾಳುಗಳ ಹೆಕ್ಕಿ ಹೆಕ್ಕಿ ಹೊಟ್ಟೆ ತುಂಬಿಸಿಕೊಳ್ಳುವ ಆ ಗುಬ್ಬಿ ಮರಿಗಳ ಹಿಂಡು! ಗಂಗೆ-ಗೌರಿ, ಜೊತೆಗೆ ಗದ್ದೆಯೊಡೆಯ ಬಸವ ಮಿಕ್ಕ ಮುದ್ದೆಯುಣುವ ಚೆನ್ನ ಪಕ್ಕ ರಾತ್ರಿ ಕಳೆವ ಮೋತಿ ಅರಳೀಕಟ್ಟೆ-ಆಂಜನೇಯನ ಗುಡಿ ಹೈಕಳಿಗಾಗಿ ಇದ್ದ ಸರ್ಕಾರಿ ಶಾಲೆ ದಿನಕ್ಕೊಮ್ಮೆಯಂತೆ ದಿಬ್ಬವೇರಿ ಬರುತ್ತಿದ್ದ ಧೂಳೆಬ್ಬಿಸುವ ಶಿವನಾಮದ ಬಸ್ಸು ಬೇಲಿಸಂದಿಯ ಓತಿಕ್ಯಾತ ಸುತ್ತಲೂ ಹರಡಿದ ಗುಲಗಂಜಿ ಗಿಡ ಮಾವು-ಹಲಸು-ಬಾಳೆ-ಸೀಬೆ ಬೇಲದ ಹಣ್ಣಿನೊಡನೆ ಬೆಲ್ಲದ ಸವಿ ಕೊನೆಯೇ ಇಲ್ಲದ ಆ ಹಳ್ಳಿ ನೆನಪುಗಳು ದಿನವೂ ಮನದ ಏರಿ ಮೇಲೆ ಬಸ್ಸಿನಂತೆಯೇ ಧೂಳೆಬ್ಬಿಸುತಿರುವುದು ಹಿಂದಿರುಗಲಾರದ ಆ ಸವಿದಿನಗಳ ಅಣಕವೇನೋ!